位於香港柏寧酒店嘅露天酒吧餐廳 SKYE，為慶祝開幕兩周年，今個月特別邀請嚟自西班牙嘅米芝蓮二星名廚 Kiko Moya大駕光臨，為各位美食愛好者帶嚟精彩難忘嘅西班牙美食旅程。

米芝蓮二星食府 L'Escaleta 嘅主廚Moya，鍾情以優質在地食材為創作靈感，今次來港獻技，亦特別取材以 SKYE 烹飪團隊喺餐廳天台花園種植嘅多種香草及蔬菜，炮製一系列主題菜式。例如將於午市菜單亮相嘅頭盤「芥末荷蘭醬丶新鮮香草丶脆芝麻」，當中所用嘅香草食材正正係出自酒店嘅天台花園。

據悉，Moya 到訪期間，每朝都會到天台花園採摘當天所需嘅香草，而呢啲香草搭配其自家調製嘅芥末以及注入火箭菜味道嘅荷蘭醬，再以焦糖芝麻帶出獨特嘅口感層次。

另外，「岩蝦冷麵」口感豐富，西班牙傳統慢烤蕃茄洋蔥醬嘅甜味，搭配以餐廳於天台花園種植嘅玫瑰香草調配而成嘅番紅花油醋，甜、酸滋味完美融合。另一道佳餚「新鮮石崇魚丶海膽」，就以嚟自地中海嘅石崇魚擔當主角，配以日本海膽，撞出強烈嘅鮮味火花。

至於 Moya 嘅招牌「糯米巴巴里鴨」就係最大亮點。呢味菜幾乎用盡一隻鴨嘅所有部位，當中 Moya 以香煎鴨胸，搭配以鴨骨熬成嘅高湯烹煮成嘅西班牙短粒米，菜式所用嘅「牛油」則提煉自鴨嘅脂肪。此外，用作熬製高湯嘅西班牙諾拉辣椒，一早已經喺 SKYE 嘅廚房進行風乾處理，以顯其烹調過程嘅一絲不苟。

整個美食旅程再配上由 SKYE 精挑細選嘅葡萄酒佳釀，足以將整個餐飲體驗提升至更高層次；而賓客亦可於晚餐前或用餐之後，享用餐廳設計嘅多款創意雞尾酒，盡情享受 SKYE 獨有嘅維港美景及舒適輕鬆氛圍。

留意返，Moya 只會喺 2018 年 9 月 13 日起至 15 日一連三天駐場，記住唔好錯過呀！

SKYE資料

SKYE 可容納 165 位賓客，當中包括主用餐區、三間貴賓宴會房及恆溫露天酒吧，將維多利亞港及維多利亞公園的迷人景致盡收其中。SKYE 位於香港銅鑼灣告士打道310號柏寧酒店27樓。