文：喪女

以下有兩種婚姻生活情景：

（A）夫妻收入一樣，無小朋友，老公老婆付出一樣嘅家用，租金水電煤開銷樣樣平均分擔。由於大家付出嘅金錢價值一樣，男女雙方平起平坐，女方享有與男方同等既話語權同決定權，而且因為女方獨立自主，一旦婚姻關係有乜「依郁」，女方可以較容易抽身離場；

（B）夫妻收入一樣，無小朋友，老公老婆付出家用嘅比例係7：3甚至更高。女方付出較少嘅金錢價值，落袋「私己錢」較多。女方作為一個被照顧嘅角色，屋企大小事務同決定都以男方馬首是瞻。

點解討論拍拖應否「AA制」前，要先睇兩種婚姻生活模式？因為拍拖模式其實就係婚姻生活模式嘅雛形，兩個人點拍拖，兩個人往後就點一齊生活，係生米煮成熟飯之前，女人有需要問清楚自己想點。

如果你嘅安全感係源於獨立，你重視自己係一段關係中要有say，希望將來能以（A）嘅模式過日子，咁係同對象食過幾次飯覺得情投意合，而男方開始用「請你」嘅方式去表達想進一步發展嘅時候，你就應該要主動畀返一份，形式可以係你一餐我一餐。值得注意嘅係，部份男士會以「埋單」嚟獲取尊嚴同優越感，所以就算你想「AA」，都唔好因為追求獨立而「硬橋硬馬」地「AA」，以免令對方誤以為「食檸檬」而錯失好對象。

而如果你好清楚自己係一個渴望被照顧嘅女人，你嘅安全感係源於有錢揸手、有人養，咁係同對象嘅相處過程中，你絕對有權剔除「AA制」思維嘅男士，因為你最終想要嘅係（B）呢種生活。當然係現實操作層面，我哋聽過太多「追時當係寶，追到當係草」嘅例子，係confirm咗戀愛關係後，正印遇待即時被削減。你男人把口依然話愛你，但佢付出嘅金錢就計住度住。如果你伴侶口中嘅「愛」，只能提供到一個有限程度嘅照顧，咁接受與否或是妥協幾多就係每個人嘅選擇。

當然，呢啲都只係好簡化嘅情況，現實中有人付出好多同時比條佬食住，又或者大權在握兼管到伴侶乜都「上繳」嘅都有，而（A）（B）兩種情況其實都各有優劣，講到尾都係要坦白知道自己想要啲乜。衰啲推盡去講，呢個世界總有人拍拖係為咗食人嘅住人嘅，結婚係為咗賺錢，不論男女，呢種無賴皆不在討論之列。

文：躁男

曾經聽過一位權威親戚話，佢同女友食飯從來都係AA制，亦唔會特別送嘢畀女友，聽落好似好巴閉，實情我覺得佢根本唔愛另一半。如果連拍緊拖都唔願意付出金錢同心思，點說服到另一半跟你一世先？

咁當然喇，躁男唔係主張咩都係由男方出晒，亦唔應該咩都計住度住，你請一餐、佢請一餐，又或者貴嘅男仔請，食糖水、去便利店買嘢先由女方畀，咁樣對一段關係嚟講就最健康。

躁男有個朋友，同女友拍咗兩年拖，由於女方年紀都唔細，雙方已經去到談婚論嫁地步。奈何女方非常demanding，一星期要見成4至5日，銀包長期袋住張20蚊紙，即係餐餐飯都係男方畀。但與此同時，個女仔又要逼個男仔每個月儲成萬蚊，為「上車」做準備，真係聞者流淚。最後因為男方財政、時間同體能上都配合唔到對方，搞到分手收場。

家陣百物騰貴，拍拖嘅終極目標都係結婚，交往吃、喝、玩、樂嘅同時，亦要為築愛巢呢個艱巨目標而努力，另一半願意分擔吓洗費，當然係好事。

畢竟一段關係，冇理由單方面不斷去付出。