負責管理日本高速公路嘅 NEXCO 北海道分社，每個月平均要用 30 個鐘去處理失物認領事故，皆因唔少司機匆匆忙忙去完廁所之後，都成日漏低個人物品喺廁格，當中有 6 成係手機同銀包。

有見及此，NEXCO 公司特登裝咗個大塊門 Lock，等大家「開大」嗰時可以將電話或者銀包擺上去，當你離開廁格開門鬆人嗰時，一定要拎返個人物件先開到門，咁就唔會再漏低嘢喇！

據 NEXCO 公司表示，自從由上年 9 月喺北海道 8 個廁所安裝咗 61 個呢種門 Lock 之後，平均每個月只係需要用 12 個鐘去處理失物認領，比之前用少咗超過一半時間，NEXCO 公司話正考慮大力推廣呢個門鎖，擴展到日本其他城市。