蝙蝠俠、死侍、神奇女俠，係唔少人心目中嘅超級英雄人物，但對於 7 歲嘅 Max 嚟講，一班嚟自德州侯斯頓嘅冒牌超級英雄，先係佢心目中嘅真‧英雄！
是咁的，Max 仔 6 月 29 號生日，佢邀請咗 30 個朋友仔去佢嘅生日會，點知最後得 1 個 friend 出席，搞到佢鬼咁唔開心。Max 阿媽 Susann 安撫完阿仔之後，轉頭打咗個電話去德州當地電台 94.5 FM The Buzz，諗住發吓牢騷，向主持人呻吓家陣呢一代啲人冇交帶，唔去生日會都應該事先單聲。
咁啱得咁蹺，侯斯頓慈善 Cosplay 組織 HC4C 嘅成員之一 Brandi 有收聽呢個節目，於是乎佢就決定聯同班手足，齊齊喺 1 個月後畀個驚喜 Max。Brandi 喺1個月後扮神奇女俠，仲帶埋死侍、蝙蝠俠、美國隊長等等超級英雄，齊齊去幫阿 Max 補祝生日，搞到阿 Max 鬼咁開心。
Brandi 話：「我哋扮鬼扮馬只係用好少時間，但如果呢少少時間可以影響到一個人，帶畀佢歡樂同美妙回憶，絕對值得吖！」
