有冇出路見仁見智，定義亦都人人唔同，梁孔德話要搞個大灣區聯賽，如果從更高嘅角度去睇，亦唔見得係一條康莊大道，何況香港聯賽近年亦成功為部分球員做跳板，協助佢哋往外闖更上一層樓，冇出路嘅論點絕對係因人而異。

詳細計劃同內容乜都未有，搞個大灣區聯賽係咪畀港超全部球隊參與呢？如果唔係，咁會唔會減少咗香港職業球會嘅數目，從而影響球員嘅就業機會呢？大灣區聯賽又有乜嘢國內球隊呢？唔通中超嗰班球隊會派正選嚟踢？若然只係派青年軍甚至地區業餘球隊出賽，咁請問又幫到香港足球啲咩呢？

貿貿然就公開表示港超冇出路，究竟有冇諗過各方面嘅接受程度同埋感受？好多球會都積極物色緊贊助商，你咁樣講法，有出路都變冇出路啦！何況梁生身為足總主席，如果今時今日搞到無路可退，你應該首當其衝。正如香港隊前隊長陳偉豪話齋，係咪你個仔讀書唔叻就要放棄佢？

最重要嘅係，香港足球就係香港足球，如果佢變成中國足球其實係冇意思，我哋平時去食餐飯，通街已經係大集團食肆，畀返啲小店大家揀好唔好？唔好連選擇嘅空間都扼殺埋，香港人就係要睇香港足球，呢啲係一種情懷同埋精神，要高水準比賽可以扭開電視睇英超，排隊都未輪到大灣區聯賽，入得場就係要睇香港球員同香港波，梁生究竟知唔知香港球迷要乜？

唔要個仔就請離開，但唔好賣佢去大灣區。

專欄作者簡介：
辦公室日報 聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/