文：躁男

男人睇世盃，女人實嬲豬？點解唔係「女人阻住睇世盃，男人實嬲豬！」先？四年一度，女人阻住我睇世界盃就勢係假，查實平時行街、食飯、睇戲、煲電話粥，已經將日常所有時間奉獻晒畀你，一個月嘅世界盃啫，唔係咁都唔識體諒呀？

試諗吓，平時皇馬、巴塞喺西甲打生打死，家陣沙治奧拉莫斯同碧基齊齊鎮守西班牙後防，此情此景，正正係令我哋呢班麻甩佬感動嘅「Bromance」時刻！你話你係大埔Lu Lu、識波就話啫，而家我哋唔係要求你識波，係要求你咪喺世界盃期間成日黑口黑面同畀說話我哋聽，等我哋班麻甩佬可以安安落落睇波得唔得先？

又有啲女會Over咗，好想去學睇波，去融入我哋班球迷嘅世界。之不過我哋開始睇波嗰陣，你哋都未開始發育，我哋嘅足球知識隨時Pro過班足球評術員，你話成班兄弟睇波，你走埋嚟問「點解冇碧咸嘅？」、「點解C朗又踢皇馬又踢葡萄牙？係咪收咗兩家茶禮？」、「咩係越位？」嘅話，我哋會好火滾！

又有一種女仔，佢哋係屬於「默默耕耘型」，求我哋受埋佢一齊睇波，會靜靜哋坐喺側邊。查實你坐得喺度，唔通我當你透明咩？我點都要用時間招呼吓你，變相又係阻住我睇波。況且一睇波，成班麻甩佬肯定粗口橫飛，有個女人喺附近實周身唔聚財。

不如咁喇，世界盃期間早啲瞓，咪阻頭阻勢仲好喇，話唔定我會更愛你！

文：喪女

男人鐘意睇波就梗架啦，正如女人鐘意睇鞋睇手袋一樣，大家先天設定咗有唔同偏好，我覺得係應該尊重，多過話你要改變，或者抱怨對方做乜唔明你，唔投入你的世界。

係，你都可以話呢種各有各玩的關係好唔過癮，見到兄弟可以同條囡一齊通宵隊薯片、撐球隊，好羨慕。要咁比，咁我都好想遇到個可以同我一齊上堂學整cake的男人添，一齊煮飯仔不知幾有情趣，問題係你無興趣，我又迫你黎做乜呢？

喪女持終堅信兩個人係埋一齊都係兩個獨立個體，無得夾硬要求對方為你改變啲乜。兩個人如果有共同嚐好一齊high一齊down確實係正既，不過好實際咁諗，你身邊有幾多對情侶真係可以咁理想？所以如果我男友掛住睇世界盃唔理我，咪算囉，四年一次，調返轉頭，我畀咗自由空間你，第日我有姐妹活動girl’s talk，我都一樣期待返你會畀呢個空間我。公平貿易fair trade，啱無？