有「美國高登」之稱嘅Reddit討論區，日前出現咗單Hit爆貼文，話說網民Klipse11透過拍賣網站，從一位日本賣家Hirono度買咗個Wii手制，收到貨之後竟然隨手制附上贈品，係一餅極具珍藏價值嘅N64遊戲《Super Smash Bros》。

呢隻Game係十幾年前嘅作品，家吓去中古店都未必搵到，就算有，隨時都價值不菲。Hirono仲附上一張感謝Note，上面寫住：「多謝購買，我送咗份禮物畀你作為答謝，雖然呢餅係日版二手Game，但真係好正，我誠意推介，希望你鍾意！」

Klipse11收到貨之後，將紙條同餅帶Post上網，大讚Hirono好人，仲話收到呢餅《Super Smash Bros》，就好似收到一份19年前嘅聖誕禮物一樣。唔少網友都大讚Hirono係頂級好賣家，仲戲言第時生個仔一定要改名叫「Hirono」。但亦有網民提出咗個疑問，就係Hirono點知個買家會有N64主機呢？點都好，贈品嘅嘢，心意嚟。