一起身就Check手機

今時今日，手機已經係「身體一部分」，一起身就玩手機相信係唔少人嘅習慣。不過據美國皮膚醫生Jacqueline Schaffer所講，如果一早起身就用手機上Social Media或者Check E-Mail，就會令你增加壓力同焦慮，影響當日嘅工作集中力。建議刷牙洗面換埋衫之後先玩電話，對精神會好啲。

「重響」無限Loop

每朝聽到鬧鐘響，你會即刻起身？定抑或係揀個「重響」Mode畀自己瞓多幾分鐘呢？有睡眠專家話，「返瞓」通常係5至15分鐘，而呢個正正係睡眠周期嘅第一階段，喺呢個階段起身就最傷。

此外，長期倚賴「重響」，會令你個腦每當聽到鬧鐘響，就代表仲有機分鐘瞓，即係話你永遠都會錯過應該起身嗰個時間。手機App「5-Second Rule」創辦人Mel Robbins建議，應該Set一個「5秒法則」畀自己，鬧鐘一響，自己倒數完5秒就要落床，否則你個腦就會打消咗落床嘅念頭。

唔食早餐

賴床同食唔食早餐係掛勾，如果遲起身趕住出門口，你就會選擇放棄早餐。經過一晚睡眠會令血糖變低，身體需要補充能量，加上朝早係腸胃吸收力最好嘅時候，食適當份量嘅早餐，有助頭腦清晰、專注力提升，令工作更有效率。所以早啲起身，食個早餐，做嘢都醒神啲。

飲太多咖啡

零食可以戒，煙可以戒，咖啡點樣戒呀？好多人每朝起身，都必定要整杯咖啡「回魂」。不過如果吸取過量咖啡因，就會影響消化，並引致暴躁、高血壓甚至容易疲倦。所以飲咖啡切勿過量，適可宜止。

起身唔飲水

無論朝早有幾趕都好，記住要飲杯水！好多人食早餐嗰時飲咖啡，但如果冇水落肚，會令你脫水，隨時出現頭痛、頭暈情況。