話說現年13歲嘅Ryan Wild，早前因為畀訓導老師話佢個髮型標奇立異，於是就罰Ryan仔離開課室，面壁思過。Ryan仔個頭係兩邊剷青，個頂就向後梳，睇落都幾Sharp醒，但估唔到英國學校嘅尺度咁嚴。

Ryan阿媽Serena知道之後扯晒火，搵當地嘅《諾定咸郵報》嚟搞大件事，強調阿仔兩年前已經剪呢個髮型返學：「我覺得我個仔嘅髮型好整潔，咁樣趕佢出課室，剝削佢嘅寶貴上堂學習時間就點都講唔通！」

根據校方規定，學生髮型係唔可以間條坑同染髮，照計Ryan仔完全冇犯規，而校方亦未就事件作出回應。