牙買加「飛人」保特不嬲鍾意踢波，之前佢已經多次向曼聯送秋波，話想加盟呢支英超勁旅，不過宣傳同堅踢係兩回事，最後會方當然不了了之喇！之不過咁，保特一直都冇放棄足球夢，自從上年喺倫敦世錦賽之後宣布退役，佢就周圍去試腳，之前就去過挪威同德國「見工」，最近直情去埋澳洲，聽講成事機會都幾高。

據悉，保特下個月會去澳職球會中岸水手進行為期6個禮拜嘅試訓，呢段時間保特會施展渾身解數，希望贏得一份職業球員合約。中岸水手話，保特係一位學嘢好快嘅運動員，如果覺得保特適合，絕對會開份約畀佢。「半途出家」嘅球壇案例少之又少，希望保特今次成功，喺體壇再創傳奇！