第一看點─邊隊勁啲？

法國無論牌面同人腳都佔優，基沙文、麥巴比、簡迪等統統都係球壇當紅炸子雞，世界盃未開波前已經被視為奪標熱門，極有機會繼1998年世界盃後，第二度成為世界盃盟主。

之不過世事無絕對，對面嘅克羅地亞都唔講得笑，今屆由16強開始連續3次加時淘汰丹麥、主辦國俄羅斯同英格蘭出局，韌力同後勁一樣咁堅，究竟呢支東歐隊伍能唔能夠再創奇蹟呢？加埋「黃金一代」莫迪歷、文迪蘇傑等支柱都有返咁上下年紀，今次極可能係最後一次出戰世界盃盛事，當然想留返個美好回憶。

第二看點─邊個最有前途？

講到最有前途，一定係法國前鋒麥巴比！呢位19歲神童今屆初登世界盃大舞台已經光芒四射，暫時入咗3球，係法國史上首位最後生嘅決賽周入球球員。麥巴比除咗腳法好之外，最得人驚係佢嘅速度，據講牙買加「飛人」保特今晚都會入場，睇吓麥巴比快啲定佢快啲喎！

第三看點─邊個最好波？

要講兩隊最好波球員，相信會係法國嘅基沙文同克羅地亞嘅莫迪歷！C朗、美斯係兩大球王吖，至於當今第三球王之位可以話爭崩頭，分別有基沙文、尼馬同夏薩特。如果基沙文能夠率領法國第二度捧走世界盃，新世代球王席位肯定非佢莫屬！

克羅地亞隊長兼指揮官莫迪歷亦係好波之人，咪睇佢細細粒，要搶佢個波一啲都唔容易，能傳擅射之餘更加係攻守兼備。呢位皇馬球星細細個係難民嚟，之後踏上球星之路，如果拎埋世界盃嘅話，咁就真係夠晒傳奇！

第四看點─邊個最靚仔？

家陣睇波，當然少不免要睇靚仔，美男子嚟講，首推克羅地亞中場拉傑迪錫！呢位金毛仔出名夠「瀟」，皮膚又白白淨，係唔少女球迷嘅男神。不過拉傑迪錫賽前話，如果克羅地亞捧盃嘅話，佢會喺額頭紋身，唔知班女Fans聽到之後，會唔會唔想克羅地亞攞冠軍呢？

法國多靚仔，如果要介紹嘅話，可以留意吓陣中小鮮肉柏華特！呢位22歲Baby Face今屆大放光芒，嚟緊肯定升價十倍，唔少傳媒都已經起咗佢底，發現原來佢有個大佢7年嘅法國小姐女朋友。靚仔、好波兼有前途，柏華特玩晒喇！