文：躁男

躁男份人就好開放嘅，一啲都唔介意另一半性感Look出街，點解？無他嘅，虛榮心囉！你戴靚錶、揸靚車出街，無非都係想Show Off啫，咁同一道理，如果你嘅另一半係養眼嘅，都唔會介意有人眼望望喇，拖出街都威啲喎，幾多人羨慕呀！

而家都2018年，香港人又話自己幾IN幾潮，其實仲點會有「驚女朋友畀人睇蝕」呢個觀念呢？況且香港唔係印度，照計唔會有太大危險嘅！不過咁，如果女朋友單獨出街又或者會夜歸，咁雙方一定要有個共識，就係唔好著得太性感，出發點係唔想心掛掛，最緊要大家安落、舒服。

躁男畀另一半著得性感，主要原因係唔想限制對方太多，女友想著乜，作為男友嘅應該去欣賞，乜都管住晒嘅話，咁就冇癮喇，係咪先？再講吖，女友著得省鏡，某程度可以帶畀自己新鮮感，吓吓著得密密實實，老實講隨時睇到厭，著得Sexy，對維持雙方關係都係一件好事。

小弟建議各位男士「鬆手啲」，畀女友著得性感少少，咁做可以令對方覺得自己冇咁大男人、冇咁專制。(查實躁男係想平時出街「遍地開花」，目不暇給，哈哈！)

文：喪女

成日話女人鐘意爭妍鬥麗，天氣熱少少，啲囡就好似剝唔切咁，肩、胸、腰、腿爭著露返餐。係呢個時候，啲賴係君子既囝就會話「啲囡好姣」。喪女我認同巿面上確係有唔少姣貨存在，但作為男士嘅你應該明白，女人著得性感係全因為你哋男人鐘意睇，甚至直白啲講，係你哋鐘意「曬」。

唔肯承認都好，每個男人心裡或多或少都有想帶條囡出嚟喺人前「曬」嘅慾望。你話我著得太少？我睇你係斥責之中欣賞嘅成份更大；你話同咗你一切都仲著咁少係想引囝「收兵」？先生你不如管好自己對眼球先啦。到我一日真係著得好「乖豬」咁出街，你又有胃口咩？見到兄弟女友/老婆嘅惹火程度，唔通你唔葡萄？女友無一種可以拎出嚟喺人前「曬」嘅價值，恐怕都要打個折扣吧？

男女博奕，永遠就係喺捉得實同捉唔實之間來來回回、收收放放，女人著得愈性感，男人愈有捉唔實嘅不安，如果唔係，台戲仲邊有得唱落去？