Converse，至今超過一百年嘅美國老牌，其中Chuck Taylor 1970s更係每個人心目中必備鞋款之一，地位非同凡響。簡單修長嘅鞋型，不論Low cut定high cut，搭配任何風格打扮都天衣無縫，加上鞋嘅布料、顏色同圖案有好大設計空間，令款式變化多端。另外，Converse每隔一排就會改下鞋嘅細節位，例如鞋頭橡膠、鞋踭黑牌、Chuck Taylor簽名等，所以愈舊愈罕有。當然，明星效應同聯成合作亦係令Converse大熱嘅其他因素。

Novesta相信冇咩香港人會聽過，由著名鞋匠Jan Antonin Bata於斯洛伐克創立，唔經唔覺就嚟80年。Novesta一直堅持用天然橡膠製作鞋底，以全人手縫製鞋面，對全個工序都一絲不苟，絕對係斯洛伐克嘅驕傲。當中Star Master同Star Dribble就好似Converse Chuck Taylor 1970s咁，係Novesta嘅熱賣鞋款，曾與CDG、Universal Works等品牌Crossover。

Vans係板鞋界地位超然，我諗佢肯認第二，冇人敢認第一。以「Off the wall」作為品牌概念，Vans成功將「獨立、反叛、街頭文化」帶到主流社會，亦建立到與眾不同嘅品牌定位。鞋款方面，經典款式包括Authentic、Sk8-Hi、Old Skool等辨識度高嘅產品，當中「格仔」圖案更成為Vans鞋款嘅一大特色，相信最近推出嘅「Vintage Military」又會吸引到一班軍事迷入手。

PF Flyers，一個擁有80年歷史嘅美國品牌，曾經係50年代贊助Boston Celtics名宿Bob Cousy，創下全年賣出1400萬對PF Flyers嘅佳績，更佔60年代所有帆布鞋嘅兩成，風頭真係一時無兩。幾十年間PF Flyers試過賣盤，輾轉嚟到New Balance成為旗下嘅子公司，亦重新推出經典款式Sandlot。其實驟眼睇都好難講出PF Flyers同Converse有咩分別，唯一唔同就係PF Flyers某啲鞋款睇落比較笨重，以及鞋頭橡膠紋路有差別。如果覺得Converse太行太多人著，不妨試下呢個美國經典品牌，話唔定有意外收獲。

當大家都以為Converse係帆布鞋始祖嘅時候，其實由倉田雲平創立嘅MoonStar早係1873年已經面世，深受日本皇室喜愛，被譽為「國寶鞋」。而MoonStar帆布鞋貫徹咗日本人追求品質嘅態度，由當地職人製作，利用罕見嘅加硫製法，令鞋底不易脫落，更具彈性同高耐磨度。講到MoonStar，不得不提嘅仲有ALWEATHER帆布鞋，獨特造型打破咗大眾對帆布鞋嘅既定印象，大部分鞋身被橡膠覆蓋，呈現出強烈軍事風，集外型、功能性於一身，就算打風落雨都冇問題，但因為打住「Made in Japan」嘅旗號，價錢都比以上牌子貴。