其實呢位經理人工都唔錯，如果我冇記錯，底薪好似係五萬幾，我舊公司係典型family business，即係做又三十六，唔做又三十六，又唔會炒呢啲老臣子，換言之佢只要不求有功，但求冇過，已經可以做一世，加上經理有老婆仔女，生生性性照計冇得輸，偏偏搞單咁嘅嘢出嚟，最後連份工都冇埋。

呢位經理同女sales行孖咇唔係咩新聞，公司同事日日都睇住佢哋一齊出街見客，坦白講係有啲怪，通常新人返工頭幾個月由資深同事帶住，長遠都係要靠自己，否則請你返嚟但要連體嬰咁做嘢，完全唔符合公司效益，何況呢度啲sales咁耐以嚟都冇行孖咇嘅傳統，所以大家見住佢哋成日打情罵俏笑住出去都議論紛紛。

某日另一個部門同事去灣仔做嘢，睇住佢兩個喺駱克道間維記行出嚟，跟住公司就開始愈傳愈犀利，咁都好難怪既，一般人如果唔知經理係已婚人士，睇落去真係會覺得佢哋係情侶。

隔咗半年後嘅某個下午，經理個老婆殺上公司又要劏又要殺，嘈到拆天咁話要搵老公同個女sales對質，公司有幾大吖？事件當然驚動埋老細啦！聽講最初冇諗住炒，但老婆原來請咗私家偵探去查，呢次真係有圖有真相，老細睇完相之後唔炒唔得，解僱原因當然唔係經理玩女人啦，私人嘢好難作為辭退職員嘅理由，不過office hour假公濟私去行街睇戲拍拖開房就唔炒唔得啦！

因為呢位經理其實冇咩料，英文唔得，跑條數唔靚，年紀亦唔係細，加上我舊公司嘅產品屬於冷門嘢，想出去再搵份五萬幾蚊嘅工作絕對唔容易，但諗真啲又唔抵可憐，有老婆仔女都出去滾，對象仲要係自己下屬，又一個衰咸濕而搞到事業都冇埋嘅例子，辛辛苦苦搵到份優差，最終因為下體支配一切而斷送大好江山，家庭都支離破碎，確實非常不智。

好多男人唔係搵好多錢，萬幾二萬蚊人工但好顧家，生活一樣可以幸福美滿，相反如果一個人冇羞恥之心、冇責任感、冇承擔、冇忠誠，搵多多錢都冇意思，呢類男人嘅人格有好大問題，跟住佢唔會過得快樂，更加冇可能得到真正嘅幸福，唔要都罷。

專欄作者簡介：
辦公室日報 聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/