E神陳奕迅當日一身Denim造型外襯黑色西裝同煲呔，隨意得嚟帶點formal，完全符合佢「大細路」性格。

首次擔任主持人嘅蕭敬騰大受好評，大家都認為主持得恰到好處，除咗主持好之外，佢當日打扮同樣令人驚喜，一身淺駝色西裝配襯透視寬褲，更穿上短靴，不但顏色配搭得宜，更突顯妖魅風格。

雖然jj林俊傑今年只係陪跑，但全黑西裝配搭，低調中盡現紳士風範，貼身剪裁亦令jj身型更修長。

上屆歌王方大同今年負責頒發「最佳國語男歌手獎」，以一身直間西裝現身嘅佢，戴住幼身圓框眼鏡，成個文質彬彬嘅書生咁出現係頒獎典禮。

獲得「最佳作曲人獎」同「年度歌曲獎」嘅盧廣仲，今年罕有咁著長褲出席頒獎典禮，一身灰色細格西裝加上白襪皮鞋，令人有一種大男孩終於長大嘅感覺。