舊公司搞成咁，的確好唏噓，但又唔覺得意外，因為我呢個前度老細一直都奉行Micromanagement模式，以前已經見識過佢安排工作畀同事，會企喺人哋個位後面望住佢做，最恐怖都係IT部有人爆料，原來舊老細一直叫IT將所有email都暗中forward畀佢，換言之佢可以睇晒我哋每一封send出去嘅email。

本來大家都想扮冇事，反正email都唔會講私人嘢，點知某次有同事send email畀個客，又冇CC又冇BCC，老細隔咗陣竟然衝出嚟鬧個同事email打錯嘢，嘩，你仲得閒過成班伙計，個個做到隻嘢咁，你就喺度監控電郵，不過老細而家應該仲忙，因為佢要好似保安咁睇埋CCTV，監管住成班人嘅一舉一動，真係辛苦晒，咁嘅工你做埋我嗰份喇！

我相信Micromanagement唔止係一種工作態度，同時都係一個人本身嘅生活態度，聽講老細嘅老婆仔女周不時頂撞佢，家庭生活都十分不愉快，因為佢成日問長問短，間唔中都會聽到佢講電話大聲鬧老婆，例如責備對方missed call，連啲仔女同朋友出街都要鬧一大餐，反映佢有好嚴重嘅佔有慾同控制慾。

其實想同事好，想另一半好，想自己緊張嘅人好，下下管住晒只會帶嚟反效果，信任身邊嘅人，彼此嘅關係先會健康同長久，限制對方嘅一舉一動，只係純粹滿足自己嘅欲望。

專欄作者簡介：
辦公室日報 聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/