睇見陶大宇《刑偵》入面嘅打扮，都唔難明白點解佢被封為「師奶殺手」。一件啡色worker jacket，內襯灰色cardigan同白tee，簡單明瞭咁展示出layering。

劇中嘅張大勇督察偏好層次分明嘅穿著風格，好多時都會見佢外襯一件vest，就好似米白色嘅quarter zip針織長袖polo shirt加深啡色皮背心，型得嚟又唔會嘩眾取寵。

雖然梁榮忠係劇中任勞任怨，成日俾「勇哥」當出氣袋，但佢著衫同陶大宇可以話不相伯仲。淺黃色樽領冷衫搭配駝色麂皮西裝褸，配色堪稱一絕。

但最令人喜出望外嘅竟然係「智叔」廖啟智，作為實力派嘅佢，劇中時常穿著格仔恤衫同parka jacket，呈現強烈嘅復古風格。

講到工裝，大家都知道係以前工人工作時嘅服裝，以舒服、耐用同多袋為主，最初嘅意念都係想方便工人工作。由於復古風再度掀起，亦令傳統工裝重現大家眼前，而一提起工裝，不得不提法國同美國兩大工裝發源地，前者早於19世紀就提供「法國藍染工裝」俾當時嘅農民同工人著，鮮明嘅藍色同時令人印象深刻；另外，美國工業發展蓬勃，為咗令工人係惡劣環境下正常工作，當地工裝嘅耐磨同品質都十分好，亦令Carhartt、Dickies等品牌聲名大噪，漸漸由工人品牌轉為潮流品牌。以下將會介紹幾間個人心水品牌俾大家，一齊欣賞工裝美學。

Universal Works係一間英倫風格嘅工裝品牌，由David Keyte於2009年成立，算係一個比較新嘅品牌。UW服裝風格偏向英倫Style，比起傳統工裝更注重材質同顏色嘅配搭，亦都嘗試應用唔同pattern落工裝，襯起上嚟更多變化。就好似上圖咁，UW就大膽將卡其同淺藍兩隻對比大嘅顏色做配襯，上身主要係Tee、格仔恤衫同Overshirt形成Layering，下身再襯返Fatigue Shorts、長襪同Novesta Star Master，係咪同傳統工裝有好大分別呢！

Stan Ray係一間歷史悠久嘅美式工裝品牌，至今已經超過40年，仍然製造堅持品質良好同耐用嘅工裝，所有產品都係Made in USA，可以話係品質嘅保證。雖然Stan Ray已經「年紀大」，但新一季多咗啲粉藍、粉紅色嘅單品，滲透住唔少青春氣息。如果唔鐘意太鮮色，大家可以試下白、灰恤衫外襯黑色Overshirt，下身配卡其色或軍綠色Fatigue Pants，加埋對Converse 1970，簡單而不失工裝風格。

Carhartt，相信就算唔鐘意工裝嘅朋友都一定聽過，係一間過百年歷史嘅傳統工裝品牌，亦係帶起美國工裝熱潮嘅品牌之一。美版Carhartt至今仍然為工人們製造耐用嘅工裝，堅持Made in USA，材料相對比較硬淨；相反，支線嘅Carhartt WIP設計風格貼近Streetwear，成為唔少年輕人追捧嘅潮流品牌之一，款式都愈嚟愈多元化，但要留意嘅係WIP產地並非USA。