文：躁男

咩話？畀女摑？呢啲事從來唔會發生喺我身上，有名你叫躁男吖嘛，邊個夠膽摑我呀！其實 41 巴呢單嘢，男嘅就低手，有乜可能玩得咁失策，偷完食會畀女友拆穿呀？道行低咗啲喎，呢鋪又真係抵畀人摑嘅！

躁男咁睇，要發洩可以有好多方法，例如可以將佢偷食嘅事跡擺上網公審佢，又或者可以去佢公司大炒大鬧。當街當巷郁手郁腳，有失身份。仲有呀，你摑咗個衰佬，係咪就等如佢會乖、會愛返你吖？唔係吖嘛！你話何必呢？

如果你問我，點先會摑另一半，我可以同大家講：點都唔會！躁男份人係躁底，但就算幾嬲都好，從來唔會向另一半出手。我明白，有好多港女係好乞人憎，相信肯定有好多男士，曾經幻想過大巴大巴星落女友度，可能嗰一刻你會覺得好爽，但事後肯定會極度內疚，因為打女人始終係唔啱。

小弟認為，如果大家真係吵到火紅火綠，而嗰一刻你又就快爆，躁男建議應該立即停止罵戰，去露台睇吓風景又好，落公園行個圈又好，等大家冷靜吓先。一郁手嘅話，無論你之前對女友幾好都冇用，你將會一世背負「打女人」同「賤男」嘅罪名。

文：喪女

偷食既嘢我咁睇：偷得一次梗有第二次，「偷」係舖「癮」，刺激快感好勝乜都好，總之食到就係爽。會唔會因為你巴掌換到「浪子回頭」呢？肯定唔會。對於賤男，我矜貴我隻手，唔想整污糟佢。男友偷食，心痛就梗架啦，但我都唔想晒力搞到心痛又手痛，仲要當街演潑婦。Come On！過晒「止蝕位」。做個有格既女人，係，今舖我係衰咗揀咗個爛橙，但衰既係你唔係我，女人要做既係負傷忍痛離場，而唔係令自己失格。你睇梅根？揀錯橙都一樣可以風光再嫁王子，勵志故事就係咁！

你問我點至會真係郁手摑另一半？唔係唔摑得，係要部署好先摑。一陣你係地鐵站摑完40巴，夜晚又返同一個屋企瞓上同一張床，有乜謂？既然已經知道賤男無得救，梗係「拿拿林」執包袱錢呀首飾呀咩貴重嘢都攞晒先，不動聲色做好退場準備。到揭牌個日，你果巴掌先至有威力，既係發洩心頭仇，更加係一段爛關係最有力既句號！所以唔洗多，一巴就夠，送多杯奶茶。