睇波淨係睇靚仔?唔夠嘅,場邊靚仔隨時仲正呀!時移世易,家陣踢波要講形象,教練係球隊嘅代表,比球員更加要執得正。以下介紹呢幾位靚仔,堪稱球壇最Man代表!
意大利專出產靚仔,踢而優則教仲要睇得嘅,點都要數恩沙基。如果講球員時代,恩沙基未算係好靚仔,但男人愈老愈有味道,現年44歲嘅佢成陣佬味出晒嚟,依然迷死唔少女球迷。
年齡:44歲 國籍:意大利 身高:5呎11吋半 現時教執球隊:威尼斯(意乙)
以前喺皇馬同碧咸做過隊友嘅古迪,貌似張致恆,由球員時代去到做教頭,佢個樣都係咁憂鬱,加上閒時鍾意彈結他Jam歌,Rock友味都幾濃。其實古迪唔撈領隊嘅話,轉行做Model都有得諗。
年齡:41歲 國籍:西班牙 身高:6呎 現時教執球隊:皇家馬德里青年隊
澳洲型男基維爾昔日風靡萬千少女,招牌式酒凹笑容一出,即刻冧死女。雖然基維爾球員時代傷多過踢,不過佢近年轉任做教頭,球迷仲有機會一睹佢嘅風采。
年齡:39歲 國籍:澳洲 身高:5呎11吋 現時教執球隊:卡維利(英乙)
相比起頭先嗰幾位傳統靚佬,施蒙尼比較唔同,佢係走粗獷路線。踢波嗰時佢係司職防守中場,即係專做爛截、掃蕩嗰啲Dirty Work。相信當年冇人覺得佢型,但做咗教練之後嗰份狂野激情,反而令佢更有魅力。
年齡:48歲 國籍:阿根廷 身高:5呎10吋 現時教執球隊:馬德里體育會(西甲)
迪法蘭斯高,一個大家可能較為陌生嘅名字,顏值亦唔夠頭先介紹嗰幾位仁兄咁高。之但係呢位型佬係屬於書卷派嗰種,次次落到場都執到正一正,「三件頭」就梗。加埋副眼鏡,呢個斯文Look都幾煞食。
年齡:48歲 國籍:意大利 身高:5呎10吋 現時教執球隊:羅馬(意甲)