Louis Vuitton 今年好似特別鐘意同不同品牌玩下 crossover，今次就跨界別同音響品牌 Devialet 合作推出呢個你諗都無諗過會同 LV 扯得上關係的 DJ Trunk。呢一款 DJ Trunk 其實唔係咩新鮮設計，早在 1930 年時，著名管弦樂指揮家 Leopold Stokowski 就特別製作「Stokowski Writing-Desk Trunk」的工作旅行箱。而今次呢個 DJ Trunk 就係用咗佢為設計靈感，集合所有 DJ 表演所需的主要用具，包括 Phantom、黑膠唱盤及唱片、混音器、電腦及耳機。呢個 DJ Trunk 全身都以 Monogram Eclipse 包圍住，而其特製 Monogram Eclipse 袋及儲存箱分別可存放約 20 張黑膠唱片及一部黑膠唱機。

另外，Devialet 更特別為 DJ Trunk 設計限量特別版 Gold Phantom，印有兩個品牌的標誌。有興趣的朋友就要留意，由於DJ Trunk 唔會有現貨發售，只提供訂購，所以想去舖頭睇完實物再考慮買唔買的話，你可以打消呢個念頭。不過，想見到佢真身又唔係無辦法! 嚟緊呢個 DJ Trunk 將會係上海首度亮相，之後會巡迴世界各地展示。