碧咸一向都係型男嘅指標,一舉手一投足都能令女士們瘋狂,而男士們就羨慕佢嘅樣、事業、成就、家庭,簡單來講即係佢嘅一切。不過,日前佢上載咗一張相到Instagram後,我覺得碧咸嘅地位開始有所動搖,而威脅到佢嘅人,正正就係「碧咸」!

咩話?碧咸威脅碧咸?你可能唔明我講咩,其實我係指佢個大仔Brooklyn。由Brooklyn出世開始,碧咸從來都無話遮遮掩掩,唔俾大家見佢個仔(其實係香港啲明星先鍾意咁樣)。大家可以話係見證住Brooklyn嘅成長,亦都見證住佢越來越有型。無計嘅,阿爸係碧咸,阿媽係維多利亞,你估佢想型架?佢都係被逼架咋!受到阿爸阿媽嘅天生優良傳統,再加上後天嘅培養,Brooklyn絕對係已經轉化成「碧咸完全體」,可以同佢阿爸「碧咸究極體」比拼一下!