【男人私竇中環chill住「鍊車」】

車係男人既浪漫，如果可以同一大班friend飲返杯，仲可以揸車「鍊」返轉，係咪人生一大快事先？嗱，而家唔係鼓吹大家酒後駕駛，想兩件事同時發生，黎中環Sideways就得啦。

眾所周知，Sideways係老牌模擬賽車競技場，係香港有近15年歷史，近年佢地搬左黎中環卑利街，空間大咗，有更多地方比大家上黎「鍊車」同「啤啤佢」。

Sideways既賽車模擬器配備像真度極高既硬件同最新軟件，駕駛席完全仿照一級方程式跑車，駕駛前要除鞋坐入僅僅容得下身位既駕駛艙，手握F1級既可調控專業軚盤同變速桿，腳踏煞車系統，基本上一坐低已經能迅速咁投入F1比賽模式。模擬器有近100款車同200條賽道，講得出既寶馬、V8超級房車、法拉利到F1賽車都有得揸。最正係佢能夠做到15位真人駕駛者同時係同一賽道上比賽，係全亞洲唯一能做到既競技場。成日話邊個手車勁，真係要黎到先見真章。香港人成日咁大壓力，Friday night黎食下嘢、「鍊」返轉啱晒！