聞格肋底員

外國怪工特別多，上個月美國加州大學就畀錢請人連食3個月牛油果，研究對體重有咩變化。不過講到怪，點都唔及英國諾咸頓郡嘅呢份工怪。當地一間香水公司，就為咗製作香水，要試吓製成品溝埋汗味會有咩效果，於是就請「聞格肋底員」。不過咪以為係香水就好聞，事關你要聞嘅，係一個噴咗香水但做完運動嘅人嘅格肋底，頂得順就去馬啦！

月薪：39,000鎊

專業哀悼者

早喺5年前開始，中東已經興起租用哀悼者呢門生意，搵人了解一下死者生前嘅背景，然後作一份講稿，喺喪禮上面發表致詞，以防個喪禮太冷清，所以某程度上「專業哀悼者」亦即係「老臨」，好考演技。英格蘭東部雅息士郡亦有一間租用哀悼者公司，視乎死者家屬嘅需要，再決定哀悼者要做乜同講乜。

日薪：45鎊

瞓覺員

瞓覺都係一份工？你冇睇錯呀！美國太空總署(NASA)早排請人連瞓70日覺，你要喺唔同嘅氣壓(包括無重狀態)底下沖涼、食飯、瞓覺，以便科學家研究身體狀況，幫助太空員日後嘅工作。咁有貢獻嘅工作仲要有覺好瞓，正呀！

70日薪金：12,000鎊

寵物糧試食員

試味好常見，試寵物糧嘅味道亦係必需，奈何寵物唔識講嘢，所以呢份工作只好搵人試！曾經擔任英國Lily's Kitchen試食員嘅Phillip Wells就話，試寵物糧令佢口感更豐富，幫助到佢嘅廚藝喎！

月薪：20,000至50,000鎊(視乎經驗)

擁抱員

其實擁抱員呢個行業，近年喺美國已經大行其道，有啲人睡眠質素差，有個人攬住可能好瞓啲。亦有啲人經歷咗啲傷心嘢，想搵個人攬吓，咁呢個時候擁抱員就大派用場。

時薪：60鎊(事前需經過10星期訓練)