Dwyane Wade早前到中國進行宣傳活動，並係北京李寧中心親自公開新一代Way of Wade。首次曝光嘅Way of Wade以黑白作為主色，鞋頭印有Wade個人專屬Logo，同時維持沿用多年嘅低筒設計。

據稱Way of Wade 7採用全新避震技術作為中底，鞋底則係前、後掌分離設計，加上配備碳纖維作為穩定支撐，但都要等官方公開新鞋詳細資訊。鑑於Way of Wade前幾代有唔錯嘅鞋評，相信新鞋表現唔會令大家失望。

除咗發佈新鞋，Wade今次嘅中國宣傳之旅仲有另一個任務，就係同李寧簽訂終身合約，成為自LeBron James後第二位獲終身贊助合約嘅NBA球星，距離擁有自己品牌嘅目標愈嚟愈接近。