全球動漫迷期待嘅《進擊之巨人》時隔 1 年多啲終於回歸，第 3 季劇情究竟會點發展當然係焦點，但估唔到竟然係首主題曲率先「搶Fo」，皆因呢個組合實在太強勁喇！

《進擊之巨人》嘅主題曲，一直都係由樂隊 Linked Horizon 主理，不過新一季就勁喇，由殿堂級猛人、X Japan 嘅靈魂 Yoshiki 負責創作，並由 Band 壇「男神」、L'arc~en~Ciel 嘅主音 Hyde 擔任主音。嘩，呢個百年難得一見嘅組合，真係有今生冇來世。

首主題曲叫做《Red Swan》，據 Yoshiki所講，其實首歌係仲未有完整版本，仲有啲細位要執同改，預計 8 月頭先會完成，無論係「進擊迷」定抑或係 Band 友 ， 新一季《進擊之巨人》絕對唔可以錯過。