機場有溫泉浸，你冇睇錯。鄰近札幌嘅新千歲機場4樓，就有間「新千歲機場溫泉」。係，個名係求其咗啲，但佢哋嘅設備同服務就一啲都唔求其，仲非常貼心添！考慮到大部份顧客都係旅客，佢哋有裝到行李嘅Locker提供，仲有免費浴衣借同埋免費綠茶飲。

溫泉有分室內同露天，浸完見餓餓哋，可以去場內嘅餐廳擦餐勁。最方便係你買乜、食乜都唔使即刻畀錢，職員會掃一掃戴喺你手嘅Locker鎖匙Bar code，臨走先一次過埋單。至於入場費方面，大人 1,500 日元，小朋友 600 至 800 日元，如果你係凌晨 1 點後先入場，即可以留到第二朝 9 點，仲包埋早餐添，啱晒要喺機場過夜或者等早機嘅人士。