故事發展得太快，我哋還原基本步，唔好諗到精子同卵子嘅邂逅問題先，因為重點係我女同事根本唔想生，以前唔想生，而家唔想生，以後都唔想生，佢根本唔鍾意生小朋友。

「可能你而家得廿幾歲，未想咁快諗生BB問題啫，遲啲先再同男朋友傾囉。」

「我好清楚自己，我真係唔想生呀，呢啲唔係我想過嘅生活。」

既然係咁，呢個話題已經唔使扯到去香港社會、民生、政策、林鄭、雙非學童、樓價、仔女代溝、生仔好定生女好、教育制度......等等，因為唔使再傾落去喇。

真實中嘅劇情講到呢對戀人情海翻波，兩個人因為生仔嘅問題開咗幾個非正式會議，但都係傾唔掂數，男嘅心灰意冷態度明顯轉差，但就算我都係一個男人，仍然覺得個女仔冇錯，生唔生係個人意願同自由，你究竟係愛佢，定想佢幫你生BB先？

我都好鍾意小朋友，仲要係超級鍾意嗰隻，但一定會更加愛我嘅另一半，因為我最初肯定係畀呢個女人嘅某啲元素吸引，然後先會決定追佢，再發展出一連串嘅故事。

我寧願娶個我鍾意佢，但佢唔肯同我生BB嘅女人。

專欄作者簡介：
辦公室日報 聶瞳
記者出身，後脫離傳媒行業，誤打誤撞加入獵頭公司，幫人搵工，間接令一個家庭得到溫飽，因而成為我的第二人生。

Facebook專頁：
https://www.facebook.com/officedaily/