【專欄│辦公室日報】
文:聶瞳
有一次9點返到公司,門口有個好生面口嘅男仔喺度徘徊,我嗰層得兩個office,啲人一定見過晒,又因為條走廊係掘頭路,有人喺度行嚟行去會相當顯眼。
我直覺認為有同事約咗佢上嚟見工又未夠鐘,所以唔敢入嚟啦,點知過咗一陣,幾個同事先後喺唔同時間返到,都話喺走廊見到有人徘徊,咁我就知佢應該唔係嚟interview,首先冇理由早咁多,其次係點解唔撳鐘叫receptionist畀佢坐低呢?
唔通曾經有同事冇盡力幫呢個男仔搵工,所以佢上嚟找晦氣?不過即使有咁嘅事,對象都一定唔係我,直到10:30去廁所,出到去仲見到佢喺度,我忍唔住問:「你係咪搵我哋公司呀?使唔使入去坐陣?」
佢禮貌咁回答唔係,又繼續行嚟行去,真係令人摸不著頭腦,去完廁所返出嚟,終於見到佢撳電梯走喇,不過身邊仲多咗個女仔,仲聽到個女仔講:「你喺樓下等咪得囉,你企咗喺度個幾鐘呀?唔使日日都咁樣陪我見工喎。」
「心急想知吖嘛,見成點呀?」
愛情嘅魔力真係好偉大,不過我好想同呀男朋友仔講聲:「定啲嚟喎,見完agency仲要去見個客,唔會咁快知答案。」
做咗咁多年人,見過唔少歇斯底里嘅愛情故事,出發點係好既,邊個女仔唔想個男朋友緊張自己?但要留住所愛嘅人,單靠咁樣係唔足夠,短期內對方雖然好冧豬,不過長遠嚟講,佢會遇到一啲更出色同埋更叻嘅人,到時可以點算?
男人一定要發展自己事業,愈戰愈強,咁先可以照顧到另一半,呢個過程必需要經歷,捱過咗,你一定會有更多時間陪佢,並且成為一個值得倚靠嘅人。
真正愛一個人,真正想畀幸福對方,除咗適當嘅緊張同關心,努力工作都好重要,因為咁樣先能夠擴闊自己嘅視野同埋提高收入,愛可以奮不顧身,但唔好忘記社會始終係好現實。
專欄作者簡介: 辦公室日報 聶瞳 記者出身,後脫離傳媒行業,誤打誤撞加入獵頭公司,幫人搵工,間接令一個家庭得到溫飽,因而成為我的第二人生。
Facebook專頁: https://www.facebook.com/officedaily/