手造眼鏡除咗以職人手藝作為賣點，當中不得不提嘅仲有賽璐珞呢種材料，硬度高、密度高、帶有特殊光澤，成為唔少眼鏡迷追捧嘅原因，但由於賽璐珞製作需時同危險，所以不少品牌都放棄以賽璐珞為主要材料，令呢種材料製作嘅眼鏡更為稀有。

金子眼鏡係好多港人熟悉嘅日本眼鏡品牌，每逢去日本旅行一定會入手，為嘅只係比香港買平少少。金子眼鏡由金子真也於1958年創立，初期主要賣職人作品，亦令到泰八郎、井戶多美男等職人聲名大噪。後來因為職人相繼退隱或離世，金子決定加強品牌推廣，培育人才繼承手藝，金子眼鏡成為手造眼鏡的入門首選。

日皇御用品牌Masunaga增永眼鏡係日本百年老牌，係1905年由增永五左工門創立，佢令福井成為全日本九成眼鏡嘅出產地，被視為福井眼鏡之父。做得日皇御用眼鏡，增永肯定有其過人之處，舒適輕巧、手功細膩，以及對品質嘅執著，令增永百多年嚟依然屹立不倒。

結合日本傳統手藝同英倫風格係Yellow Plus一大特色，創辦人山岸稔明來自日本眼鏡殿堂福井，曾經去歐洲留學，對英國情有獨鍾，所以產品大多以經典英國眼鏡為基礎，並根據東方人輪廓改良，務求令東方人佩戴時更感舒適。

美國品牌Oliver Peoples由Larry Leight於1987成立，以懷舊復古作為品牌核心，成功吸引唔少荷里活明星如Johnny Depp同Robert Downey Jr.嘅青睞。而日版Oliver People更係香港人近年最愛眼鏡品牌之一，由於數量稀少，每次推出一定引起關注，加上日版設計貼近亞洲人，比意版更加細緻，戴出街一定唔怕同人撞款。

Thom Browne係時裝界風頭一時無兩，近年更積極進軍手造眼鏡界，聯同日本職人合力打造皇牌型號TB-011，成功係手造眼鏡界搶佔一席位。Thom Browne手造眼鏡嘅一大特色就係揉合Acetate同鈦金屬兩種物料，以夾心形式呈現，涉及320個工序，花費8至12個月時間全神貫注咁打造，所以TB-011受歡迎程度非同小可，搞到經常缺貨，真係有錢都買唔到。