意大利咖啡、Pizza同時裝出名，足球亦係呢個國度嘅重要文化之一，貴為意大利頂尖時裝品牌嘅Versace，上個月已經首度推出自家品牌波衫，黑紫直間配埋大大隻Versace Logo字樣夠晒搶眼，亦獲得唔少好評。

Versace決定添食，落實月內出勻「作客」同「第二作客」球衣，「作客版」以黑灰直間作主調，Versace Logo字款就用上更加搶眼嘅金色，加埋鮮紅色領邊作點綴，絕對係夠晒型格。「作客」同「第二作客」球衣本月25號就會正式上架，每件盛惠560英鎊，圍起即係大約5,834港元左右。