要講最為人熟悉嘅香港區明星父子，就不得不提Chef Le Mon（謝霆鋒）同爸爸四哥（謝賢 ）。謝霆鋒自小就深得爸爸真傳，有種型英帥嘅DNA，二人無論係電影、電視，抑或綜藝上都大受觀眾歡迎。究竟佢地兩父子係咪真係咁fd架？

雖然藝人生活成日都好忙，令到佢地嘅相處時間少咗，霆鋒亦都曾經自認係個好獨立嘅人，所以表達愛意嘅能力好差。但係話雖如此，佢地嘅行動已經出賣左兩仔爺係幾咁父子情深，好似早前謝賢以驚喜形式上Chef Le Mon 招牌節目《十二道鋒味》，特登上去試霆鋒所煮嘅菜，仲要謝賢為霆鋒獻出上煮食節目真人騷嘅第一次，可見佢係幾咁支持阿仔。而同場嘉賓楊紫瓊仲話「四哥經常向人說兒子不像我，因為沒有我兒子這麼本事」，從言談之間都見到四哥對阿仔霆鋒引以為傲。

論型英帥，當然唔少得海外區代表，萬人迷廿十四孝老豆碧咸（David Beckham）同個仔布魯克林（Brooklyn Beckham）。佢兩父子除左一樣咁靚仔，感情仲好到不得了。前排Brooklyn就只孖住老豆一齊去日本玩，齊齊食「米芝蓮」美食，去築地魚市場參觀。係碧咸43歲生日個時，因為Brooklyn係紐約讀緊攝影，令碧咸以為無得齊齊整整咁慶生，點知食食吓生日飯個時，Brooklyn突然入左餐廳，從後backhug老豆，開心到碧咸即刻錫啖Brooklyn，更感動落淚，完全無諗過阿仔會山長水遠返倫敦為佢慶生。

因為《爸爸去哪兒》而令父子感情大增嘅就係陳小春同Jasper。Jasper同小春十足十餅印一樣，而佢可愛純真嘅樣亦都迷到好多人。

估唔到一向火爆嘅小春，一見到Jasper就會熄火。小春見到Jasper行到慢，就多次好大聲咁叫佢「Hurry up！」，但係Jasper驚都未驚過，仲同爸爸講「Can you stop angry now？」，小春知道過左火之後就即刻同仔仔道歉啦。當見到Jasper喊，小春又會即刻跑去抱起仔仔，仲話「佢喊我唔抱，咁邊個抱？」。雖然小春表面上對Jasper好惡，但其實心入面真係錫到佢燶。

仔仔當然係爸爸嘅向日葵啦，Jasper都唔例外，拍節目玩遊戲時，小春對Jasper講「I love you」時，Jasper即刻為爸爸打氣，答「I love you too forever」，又不斷鼓勵爸爸，小春當堂冧晒，唔洗講都知佢地有幾愛對方啦！