文：辦公室日報x聶瞳

男人唔可以窮？如果男人試過捱窮，可能係一件好事，因為佢會識得點樣避免再窮落去，就好似一支球隊永遠都踢緊順境波，偶爾落後就會不知所措，進退失據，只有經歷過風浪，嘗過高低起跌，先會學識保持勝局。

大把人都捱過窮，個個都可以絕地反擊咩？無可否認，身邊有唔少朋友都曾經被人睇低，有啲人心理質素欠佳，一味得個嬲字，大大聲話唔會衰畀人睇，奈何冇做實質嘅嘢幫自己提升；另一種人比較踏實，發奮圖強，只係一次唔得，兩次失敗，然後就開始認命；仲有一種人嘅軌跡差唔多，立定決心一雪前恥，喺欠缺經驗之下都係一次又一次跌低，唯一唔同嘅係，呢種人會汲取經驗同教訓，慢慢搵到屬於自己嘅路。

歲月嘅風霜同洗禮，的確係好無情，唔係每個人都可以好似嘅電視劇一樣，出人頭地之後就君臨天下，然後喺街撞返個舊情人，睇住佢點樣落泊點樣折墮，跟手嚟個好心涼嘅結局，現實生活點會咁戲劇性？其實有冇喺睇唔起你嘅人面前威返鋪並唔重要，搵到一個珍惜你，從來無嫌棄你嘅人，同佢一齊分享成果，咁先至係重點。

講到尾，睇死你會一世捱窮嘅人，只係我哋生命中嘅過客，輕如鴻毛，呢種大反派嘅出現係幫助你成長，何況點樣為之唔窮？個人嚟講，真係唔使住複式豪宅，只要三餐無憂，唔使借錢度日，對我嚟講已經叫做唔窮，要鬥有錢，一定天外有天，可以養得你心愛嘅人，唔使佢憂柴憂米，我覺得已經好富有。