日本飲品生產商 Dydo，3 年前喺大阪試推免費借遮計劃，希望回饋社會，照顧一班冇帶遮嘅巴絲。Dydo 將裝住 7 把遮嘅箱掛喺汽水售賣機側邊，只要大家用完之後嚟還遮就 Okay。計劃本身係 3 個月試驗性質，大家都知日本人一向守規矩，Dydo 見「失遮率」極低，於是正式喺東京推行呢個計劃，全東京足足有 500 部 Dydo 汽水機有免費遮借。

查實呢個計劃唔淨止 Dydo 出力，日本嘅東武鐵道同東急電鐵，都有將乘客漏低喺車箱嘅遮捐畀 Dydo ，然後呢間汽水公司就會將呢批無人認領嘅遮換過晒印有「Dydo」字樣嘅手柄借畀人，提醒大家用完之後唔好據為己有，記住還遮等其他人受惠。