媽媽Cindy Crawford係OMEGA嘅面孔，Kaia自細經常聯同屋企人出席OMEGA嘅活動，同呢個瑞士品牌「大家族」已經有一份好深厚嘅Connection。所以Kaia話如今成為Trésor碟飛系列代言人，其實感覺係好舒服同親切，只係將雙方嘅合作關係移師到一個更大嘅舞台。

一講Kaia，外間難免會搬埋媽媽Cindy出嚟做比較，唔知Kaia又點睇呢？Kaia坦言自己比較男仔頭，但就遺傳咗媽媽嗰份典雅，表示兼具典雅同摩登風格，反而更切合Trésor嘅作風。因為Kaia認為腕錶唔再係畀你睇時間咁簡單，而係一種生活態度、畀你去表達個性，理念同佢嘅特質好夾。

被問到邊個係Kaia嘅Inspiration，佢話：「一定係媽媽！媽媽內在美同外在美兼備，我從來聽過任何人講過佢一句壞話，人人都覺得佢好善良同高貴。」

做得代言人，當然要將代言品牌發揚光大。年僅16歲嘅Kaia話每當提起OMEGA，就會聯想到「質素」同「歷久不衰」兩大優點。佢希望將訊息傳遞畀呢一代嘅人，將OMEGA精神宣揚出去，透過腕錶去表達你嘅個性同品味。

Kaia指Trésor系列係佢最鍾意嘅腕錶Style，因為年青一代往往鍾意將Luxury同Casual Style溝埋一齊去突顯風格同個性。

唔講唔知，見慣大場面嘅Kaia以前係怕羞女一名，佢透露如今咁有自信係有一大秘訣，就係要認清楚自己嘅內在美同優點。Kaia話就算佢冇呢個靚樣，都一樣會好有自信，因為佢參與好多慈善工作，幫到人自然會開心，見到人開心就係佢嘅自信來源。