一聽到林寶堅尼呢個名，大家好自然咁就會諗起佢地顏色鮮豔嘅跑車，而如果唔係車迷的話，大家嘅印象就真係咁多喇。早前呢間意大利超跑車廠宣佈將會推出「夢幻 SUV」Urus，並預計係 2018 年第一季就可以出貨。

好多人聽到呢個消息都嚇一嚇，然後會話：「下? 林寶都出 SUV? 唔係呀麻?」。如果你都係咁諗嘅話，你唔好以為你係唯一嚇親嘅人。因為早你三十年，應該已經有人諗過同講過呢一番說話。大部分人都以為 Urus 將會係林寶首次推出嘅 SUV 車款，但你地就大錯特錯喇。原來早係 1986 年，林寶堅尼就推出過一架名為「Rambo Lambo」嘅 SUV。當時車廠以廢棄嘅美國軍用車Cheetah 作為藍本，係 1986 至 1993 年期間生產咗全球僅有嘅 301 架「Rambo Lambo」。

由於呢間「Rambo Lambo」咁少產量，而令到好多車迷收藏家都好有興趣。而係呢 301 架嘅「Rambo Lambo」當中一架，早排就係紐約蘇富比拍賣行嘅拍賣中出現咗一架 1990 年 全黑 「Rambo Lambo」Lamborghini LM/American ，並且以 $467,000 美元（大約 $3,500,000 港元) 賣出。據悉，雖然話係已經 27 年車齡，但係經過翻新後，無論車外定車內都十分靚仔。如果我有多餘錢的話，我都真係會買一架。(前提係我要有咁多多餘錢)